Mugmog
Pira-pirasong mga hibla ng sinulid
Mga tali tali na minsa’y putol
Mahaba at buhol-buhol
Sama samang mga sinulid
Iba’t ibang kulay
Mga kulay na minsan magkakasama
Marami at iisa
Nakapulupot, kinidkid at paikot
Pinakapal na ng panahon
Panahong iniipon
Hindi matapon-tapon
Mga ginupit na lagpas at sobra,
Mag hibla pinagsama-sama
Makalikha ng pang palaman
Lamang ipapasok sa supot na tela
Tinatagpi ng iyong pagyakap
Hinabi na yari sa kamay
Pinuno ng kay tagal
Pampalambot ng iyong unan
Binalutan ng pundang pagmamahal
Tinahi yari sa mga ugat
Paraang alam upang maranasan
Paghiga, paghinga , pahinga
Paglapat ng ulunan
Pag yakap at pag-iingat
Ramdam sa mga kahimbingan
Salamat sa aking inang pinagpaguran
Pira-piraso hinabing himbing
Tayo, ikaw at ako
Lahat tayo, tayo-tayo
Pagtibok, pagdaloy ng mga dugo
Mananalaytay, magkakonektado
Nararamdaman ang mga laman
Niraramdaman ang pakiramdam mo
Tuloy-tuloy sayo
Pinanggalingan ng galing sa puso
Bukas na unti-unting binubuo
Bukas na kalooban ng pagkatao
Ako bilang ako at sa karugtong ng puso
Kailang tumayo, dahan dahang pagtubo
Raffy T. Napay